Dette er puslespelet som Signe fekk sjå hjå Torleif Elgvin. Det er slett ikkje lett. Det manglar fleire brikker enn dei som er att.

Når Signe får eit puslespel, ligg det vanlegvis i ein ask. På loket kan ho sjå eit bilete av det ferdige puslespelet. Men her finst det ikkje noko slikt lok. Dette er ein heilt ukjent tekst, så vi veit ikkje kva det skulle ha stått på dei stykkja som manglar.

Men ut frå dei orda som er leselege, gjettar Torleif at dette er ei lita bibelhistoriebok eller andaktsbok. Boka fortel om korleis Gud skapte verda, korleis han berga Noah frå syndfloden, og korleis han berga Israels-folket frå egyptarane.

Torleif har brukt oppskrifta til høgre for å leggje dette puslespelet, og resultatet er imponerande.

Puslespel

Qumran-forskarar blir gode til å leggje puslespel. Her kjem oppskrifta:

• Steg 1: Sorter ut alle fragment som har høyrt til same bokrull. Det er ikkje så lett som det høyrest ut til. Tenk deg at du finn brikker frå hundre ulike puslespel som er blanda i hop, på golvet.
• Steg 2: Finn bitar som passar saman, kant mot kant. Det er dette du gjer når du legg vanlege puslespel.
• Steg 3: Finn ord eller setningar som passar saman. Av og til finn du ei setning som byrjar i slutten av ei linje på eitt fragment, og som held fram i byrjinga av ei ny linje på eit anna fragment. Då kan du plassere desse to fragmenta på rett plass i puslespelet, sjølv om du manglar nokre brikker mellom dei.
• Steg 4: Prøv å finne ut kvar i bokrullen dei ulike fragmenta har høyrt heime. Det høyrest rart ut, men her kan du ha god hjelp av skadene på boka! Det er ofte eit mønster i slike skader. Dersom boka er mark-eten, kan du til dømes finne att holet marken har laga på mange ulike fragment. Då veit du at desse fragmenta har lege rett utanpå kvarandre den gongen boka var ein rull, og så kan du prøve å tenkje deg korleis boka såg ut når ho var rulla ut.

Du treng både røynsle og flaks for å løyse slike oppgåver. Ofte lukkast det ikkje å plassere alle fragmenta på rett plass.

Attende til: Fragmenta

Neste: Brikken

Innhald