Attende i utkikstårnet i Qumran. Når Signe snur seg mot sør, ser ho denne utsikta. Qumran-ruinen ligg på ein bakketopp, mellom fjella og den vide sletta ned mot stranda ved Dødehavet.

I denne delen av Qumran-ruinen ligg fleire av dei største og viktigaste romma. Lengst borte på bakketoppen, til høgre på biletet, kan du skimte noko som ser ut som eit buss-skur. Det er eit moderne soltak, bygd på eit utsiktspunkt mot hole 4Q. Sjølve hola ligg utanfor biletet, til høgre.

Det er vanskeleg å sjå langt, for lufta er disig på grunn av varmen. Over Dødehavet er det nesten som skodde.

Ruinen

Korleis kunne nokon finne på å byggje slikt eit stort hus langt ute i øydemarka? Kva var Qumran-anlegget eigentleg?

Forskarar har føreslege fleire ulike teoriar.

• Festning: Det er murar rundt, eit vakttårn i midten, og godt oversyn over den nordlege delen av Dødehavet. Kan Qumran ha vore forlegninga til ein liten militærkoloni, kan hende ein grensepost?
• Landstad: Nokre rikfolk frå Jerusalem hadde stader i varme strok som dei kunne reise til i den kalde årstida. Kan Qumran ha vore ei slik "luksushytte"?
• Herregard: Det er funne spor av ulike dyr og plantar i Qumran-ruinen. På sletta ved Dødehavet veks det daddelpalmar. I fjellet ovanfor går det an å dyrke korn. Kan Qumran ha vore ein storgard?
• Religiøst senter: Det er funne eit stort religiøst bibliotek rett i nærleiken. Eit avansert system for vassforsyning kan tyde på at det budde menneske her som tok religiøse reinings-seremoniar svært alvorleg. Kan Qumran ha vore eit slags kloster, eit bu- og arbeidsfellesskap for folk som ville studere Bibelen og leve eit heilagt liv?

Dei fleste forskarane held på den siste teorien.

Les meir om:

• Rundtur i Qumran-ruinen
• Dødehavet

Førre: Fragmenta

Neste: Menneska

Innhald